Implementasaun Programa PNDS Tenki Benefisia Direita Komunidade

Diretora ST PNDS, Dulce Guterres Junior kaer liman ho Primeiru Minstru RDTL,Taur Matan Ruak.

Diretora ST PNDS, Dulce Guterres Junior kaer liman ho Primeiru Minstru RDTL,Taur Matan Ruak.

Primeiru-Ministru Taur Matan Ruak orienta kestaun ne’e ba estrutura PNDS wainhira Diretora PNDS, Dulce Guterres Junior hamutuk ho ekipa halo Audensia ho Primeiru-Ministru, Taur Matan Ruak iha Palacio do Governo Dili, 04/06/2019.

Objectivo principal husi audensia ho Primeiru-Ministru mak atu informa progresu implementasaun Programa PNDS hahu husi 2013 ate 2019, tantu orsamentu ne’ebe aloka ba PNDS no projeitu ne’ebe mak implementa ona iha suku hotu iha teritoriu Timor-Leste, inklui kooperasaun serbisu ho parseiru sira.

Hafoin sorumutu ho Primeiru-Ministru Iha intervista ho media sira Diretora S.T PNDS, Dulce Guterres Junior haktuir katak PNDS implementa projeitu infraestrutura basiku tuir Menu Indikativu ne’ebe hakerek iha Matadalan PNDS, infraestrutura basiku ne’ebe durante ne’e komunidade sira implementa mak irigasaun, be’e mos no Estrada Rurais inklui projeitu balun ne’ebe komunidade sira sente necesariu tebes iha sira nia moris. Diretora PNDS informa mos katak ba tinan 2020 sei iha revisaun ba matadalan PNDS nia tanba ne’e mak PNDS persija hetan orientasaun husi Chefe do Governo ba mata dalan ne’e rasik hodi apar diak liutan ho kondisaun iha baze. Diretora informa katak hanoin husi Primeiru Ministru maka implementasaun PNDS tenki simples no lalais fo benefisiu ekonomikamente ba komunidade iha baze.

Primeiru Ministru RDTL, Taur Matan Ruak,konversa hela ho estrutura ST PNDS konaba rejultado implementasaun PNDS

Primeiru Ministru RDTL, Taur Matan Ruak,konversa hela ho estrutura ST PNDS konaba rejultado implementasaun PNDS

Iha fornesementu material konstrusaun Diretora PNDS informa tinan–tinan loja deit mak sai fornesedor ba material no ekipamentus servisus, maibe tinan ne’e  PNDS loke mos espaco ba iha kompanha lokal sira ne’ebe iha  kapasidade hodi fornese  material no ekipamentus sira hodi nune’e kompanha lokal sira bele desenvolve an.

Alokasaun orsamentu ba PNDS iha tinan 2019, Governu aloka U$ 9.7 miloens, agora dadaun PNDS ejekuta ona 43% husi orsamentu ne’ebe aloka ba  PNDS, orsamentu sira ne’e  Ministeriu das Finansas halo transferensia direita ba iha konta bankaria suku. Iha sorumutu ne’e Primeiru Ministru promote iha tinan 2020 governo sei aloka 22 miloens ba PNDS hodi kobre implementasaun iha suku hotu iha teritoriu Timor Leste, tanba ne’e PNDS persija perpara an diak liu iha forsa trabalho hodi implementa mos projetu husi kooperasaun ho instituisaun seluk hanesan PNTL konaba Uma OPS, Edukasaun konaba Eskola no fatin halimar inklui projetu seluk.